YAXŞI KİTABLAR HAMI ÜÇÜNDÜR...
Yəqin siz də çevrənizdə qavrayışı yaxşı olan, amma dərslərinə fikir verməyən şagird haqqında bu ifadəni tez-tez eşidirsiniz: “Başı var, amma oxumur...”
Bəs o uşaq niyə oxumur? Niyə zirək, ağıllı görünən bir uşaq öz potensialını ortaya qoya bilmir? Səbəb nədir, problem nədədir? Nöqsan məktəbdə, müəllimdə, təhsil sistemdə, tədrisin təşkilində, uşağın özündə, yoxsa ümumən yanaşma və düşüncə tərzindədir?
Olduqca ciddi suallardır və dünən internetdə "Başı var, amma oxumur" adlı kitab haqda məlumat oxuyanda bu suallar içimdə yenidən baş qaldırdı. Gün ərzində axtarıb həmin kitabı tapdım və dərhal da oxumağa başladım. Oxuduqca da çoxlarımızı düşündürən bir çox sualların kitabda necə məharətlə cavablandırıldığına heyran oldum. Kitab haqqında geniş yazmaq niyyətindəyəm, amma indi burada ilkin təəssüratımı sizinlə bölüşmək istədim.
Kitabın ən önəmli cəhəti odur ki, alışdığımız ənənəvi pedaqoji vəsaitlərdəki kimi elmi sitatlar və öyüd-nəsihətlər üzərində qurulmayıb, real həyati faktlar əsasında yazılıb. Yəni müəllif “Başı var, amma oxumur” problemini araşdırarkən
öz pedaqoji təcrübəsinə, məktəbdə, sinifdə, müəllim otağında və valideyn görüşlərində şahidi olduğu hadisələrə söykənərək təhsilimizin ağrılı nöqtələrinə toxunmağa çalışıb. Ona görə də kitabda müəllimlik, valideynlik, məsuliyyət və gələcək haqqında real hekayələr, müşahidələr, pedaqoji təhlillər və bəzən özümüzə verməkdən çəkindiyimiz xeyli düşündürücü suallar yer alıb. Müəllif bu suallara hazır cavablar verməkdən daha çox, bizi illərdir adiləşdirdiyimiz problemlərə yenidən baxmağa və özümüzə çətin suallar verərək düşünməyə çağırır. Bu mənada kitabı müəllifin təhsilimizə, məktəbimizə, Ana dilimizə və gələcəyimizə ünvanladığı səmimi, cəsarətli və ümid dolu söhbətləti kimi də qəbul etmək olar.
Kitab Hədəf STEAM Liseyinin qurucusu və “Hədəf konsepti”nin müəllifi, yazıçı-publisist Şəmil Sadiqin 30 illik pedaqoji təcrübəsi və təhsil sahəsində apardığı sistemli araşdırmalarının bəhrəsidir. Əsərdə “Hədəf Konsepti”, “Təhsil dairəsi” modeli və Sinqapur, Finlandiya, Yaponiya, Estoniya, Cənubi Koreya kimi ölkələrin təhsil sistemləri müqayisəli şəkildə təhlil olunur. Müəllif real həyat nümunələri və yaşanmış konkret situasiyalar vasitəsilə müasir təhsildə əsas problemin bilik yox, düşüncə tərzi və strateji baxış çatışmazlığı olduğunu göstərir.
“Milli kimlik və təhsil”, “Təhsildən nə istəyirik?” və “Dünənin adamı bu günə sabahı öyrədir” adlı üç maraqlı fəsildən ibarət olan kitab hamı üçün, ilk növbədə isə pedaqoqlar və təhsil siyasəti ilə məşğul olanlar üçün tam yeni düşüncə ilə yazılmış gərəkli vəsaitdir.
Bu kitabı alıb oxuyan çox şey qazanacaq...
Professor Qulu Məhərrəmli
